شاہ محمود قریشی کی انسداد دہشت گردی عدالت میں پیشی کے موقع پر پولیس اہلکاروں سے سخت جملوں کا تبادلہ ہوا۔ قریشی نے غصے کا اظہار کرتے ہوئے کہا، “آج جو ہمیں زنجیروں میں جکڑ رہے ہیں، کل یہی لوگ سلامی دیں گے۔”

واقعہ اس وقت پیش آیا جب قریشی عدالت سے باہر آ کر کارکنان سے ملنا چاہتے تھے، لیکن پولیس نے انہیں فوری طور پر وہاں سے لے جانے کی کوشش کی۔ اس پر قریشی نے کہا، “میں زبردستی نہیں جاؤں گا، میرے ساتھ جو لوگ آئے ہیں، میں ان سے ملے بغیر نہیں جا سکتا۔”

انہوں نے پولیس افسران سے کہا کہ وہ اپنے سینئرز کو بلائیں کیونکہ انہیں ان سے بات کرنی ہے۔ ان کا کہنا تھا، “یہ رویہ ناقابل قبول ہے، میں اپنی جماعت کے کارکنان کو اکیلا نہیں چھوڑ سکتا۔”

شاہ محمود قریشی کا یہ مؤقف ایسے وقت میں سامنے آیا ہے جب پی ٹی آئی کی قیادت سیاسی اور قانونی مشکلات سے گزر رہی ہے، اور وہ بارہا قیادت سے یکجہتی، استقامت اور پارٹی کے اندر اتفاق کی اپیل کر چکے ہیں۔